Vil du vere med å skape betre utdanningsstøtteordningar?

Avdeling for utdanningsstøtte har ansvaret for analyse, ordningsutvikling, produkt- og tenesteutvikling, prosess og brukaroppleving. Saman forvaltar og utviklar avdelinga alle Lånekassens studiestøtteordningar.

Bygger og utviklar tenester og ordningar

Avdelinga har ansvaret for å sørge for å utvikle dei ulike ordningane til Lånekassen. Med utgangspunkt i ei kunnskapsbasert tilnærming gir dei tilsette i avdelinga råd, og er tett på utviklinga av utdanningsstøtteordningane og regelverket. Avdelinga jobbar med å utvikle smidige og brukarvennlege tenester og samarbeider tett med både IT og saksbehandlingsavdelinga.

Under kan du lese meir om kva utdanningsstøtteavdelinga jobbar med.

 

Arbeidet med regelverket

Lånekassen si oppgåve er å forvalte utdanningsstøtteordningane som er fastsette av Stortinget. I tillegg til den daglege forvaltninga av regelverket, jobbar også utdanningsstøtteavdelinga med å utvikle Lånekassen sine ordningar. I tillegg til å ha god kunnskap om verknader av ordningane, er det også viktig å følgje med på utviklingstrendar og bevegelsar i samfunnet i utviklinga av Lånekassens ordningar.

Ordningane til Lånekassen skal bidra til at ein kan tileigne seg ei utdanning som gjer ein klar for arbeidslivet med ein kompetanse som gjer ein relevant og attraktiv gjennom eit heilt arbeidsliv.

På samfunnsnivå betyr det at Lånekassen bidrar til at kompetansebehovet i samfunnet blir dekka.

Innsiktsbanken

Data og tverrfagleg samarbeid

For å kunne utvikle betre tenester, bidra i utviklinga av ordningane og regelverket, og styre produksjonen på best mogleg måte, er vi avhengig av to ting: eit godt og solid kunnskapsgrunnlag – data, og eit godt og tverrfagleg samarbeid internt.

Derfor er det viktig med analytiske hovud på både teknisk og funksjonell side, som evnar å jobbe datadrive og sjå kva data som gir best avkastning i innsiktsbanken, og som gjer at vi basert på analysar av data kan forbetre tenestene ytterlegare, eller kan seie noko om korleis ordningane fungerer.

Analyse

Lånekassen forvaltar 38 milliardar kroner i utdanningsstøtte. Det er avgjerande å vite korleis utdanningsstøtteordningane verkar – treffer dei slik dei var meint?

Avdelinga har ansvar for å analysere Lånekassens ordningar. Innsikta blir formidla på Lånekassens statistikksider, blir etterspurt av journalistar og forskarar, og blir brukt i utviklinga av Lånekassen sine tenester.

Analysemiljøet jobbar kontinuerleg med å forbetre dataa, og utarbeider innsiktsnotat og prognosemodellar med utgangspunkt i dataa. Avdelinga har også ansvaret for støttebudsjettberekningar til dei årlege statsbudsjetta.

Torleif H. Torkelsen, regelforvaltning

– Moglegheiter for fagleg utvikling

Torleif regelforvaltning.jpg

– Seksjonen eg jobbar i har det overordna ansvaret for at Lånekassen behandlar søknader i tråd med gjeldande regelverk. Fleirtalet av søknadane blir behandla maskinelt, og systemet må vere skrudd saman på riktig måte for at vedtaka skal bli riktige. Dei resterande søknadane, som blir behandla av saksbehandlarar, er ofte saker som er meir komplekse. I nokre saker kan det derfor også dukke opp avklaringsbehov som må vurderast av seksjonen eg jobbar i.

Regelverket vårt blir fastsett av Kunnskapsdepartementet, og oppstår det endringar i regelverket, vil det også oppstå endringar i våre maskinelle løysningar. Min jobb er då å blant anna kartlegge og beskrive kva som må gjerast, slik at utviklarane deretter kan få gjort dei nødvendige systemtekniske endringane.

Eg trivst veldig godt som tilsett i Lånekassen, eg har kollegaer eg trivst saman med, og eg har arbeidsoppgåver som gir meg stadig nye moglegheiter for fagleg utvikling.

Tom Halfdan Tobiassen, analyse

– Lånekassen har eit viktig samfunnsoppdrag!

Tom Halfdan analyse.jpg

– I Lånekassen jobbar vi med analyse på mange felt, eitt av felta er å forsøke å skape innsikt ut frå dei data vi har om kundane våre.

Det som er aller gøyast å jobbe med, er å finne gode svar på problemstillingar som kan forbetre ordningane våre.

Eg har jobba i Lånekassen i over ti år, og ein stor del av grunnen til at eg søkte jobb her var at eg ville jobbe innan utdanningsfeltet, og vere med på å gjere utdanning mogleg – eg synast Lånekassen har eit viktig samfunnsoppdrag.

I Lånekassen er det veldig gode moglegheiter for fagleg utvikling, det er eit godt arbeidsmiljø og vi er eit direktorat i ei forrykande utvikling, og vil vere sentrale for å løyse utfordringane i samfunnet framover. I tillegg jobbar det svært mange dyktige og hyggelege folk her.

Olaug fortel om korleis vi jobbar med produkt og tenester i Lånekassen

Produkt og tenesteutvikling

Lånekassen har fleire digitale produkt og tenester som vi utviklar sjølve, blant anna kundetenester som lanekassen.no, sjølvbeteningsløysninga og ulike søknadar. Vi får mykje data frå lærestadene, og vi har utvikla eigne tekniske løysningar for dei som tilsette på lærestadene bruker for å rapportere inn til Lånekassen.

Alle desse produkta og tenestene har ein funksjonelt ansvarleg – ein produkteigar. Når det kjem endringar i eksisterande reglar og ordningar, må Lånekassen justere og gjere endringar i tenestene og produkta. Når det blir innført nye ordningar eller det blir gjort endringar i allereie eksisterande ordningar, må det lagast nye løysningar.

Prosess og brukaroppleving

Det er viktig at kundane og dei tilsette på lærestadene får god informasjon og forstår kva dei må gjere, og at tenestene og systema er enkle å bruke. Dei som jobbar med innhald i avdelinga er med i forvaltninga og utviklinga av tenestene, og passer på at tenestene har eit klart og enkelt språk.

Engasjerte kollegaer i en hybrid arbeidskvardag

I Lånekassen vil du møte dyktige, engasjerte og dedikerte medarbeidarar og kollegaer frå fleire fagdisiplinar som ser styrken i å sameina ulike kunnskapsmiljø. Her får du hyggelege kollegaer og eit inspirerande miljø.

Vi veit at mange ønsker seg ein hybrid og fleksibel arbeidskvardag der ein både kan jobbe heimanfrå og på kontoret. Lånekassen testar ut ein hybrid arbeidskvardag der vi jobbar tre dagar på kontoret og to dagar fleksibelt.

Lånekassen si historie på 5 minuttar