NB! I forslaget til statsbudsjett for 2026 ligg det endringar i ordningane samanlikna med det forslaget regjeringa la fram i fjor. Vi har valt å beskrive det som står der, sjølv om det i den politiske debatten er førespegla justeringar av dette.
Dei minst sentrale kommunane får ny ordning
Den tidlegare føreslåtte ordninga for distriktskommunar utanfor Finnmark og Nord-Troms er no føreslått endra. Det nye forslaget omfattar berre dei minst sentrale kommunane i Noreg, dvs. kommunar med sentralitetsindeks 6, ikkje 5 og 6, slik det tidlegare var føreslått. Låntakarar som bur i ein slik kommune, skal på visse vilkår kunne få sletta opptil 25 000 kroner per år i tre år.
Eit nytt vilkår som er føreslått, er at berre gjeld frå fullførte studiepoeng i høgare utdanning eller høgare yrkesfagleg opplæring kan bli sletta.
Gjeld kan bli sletta når du har oppfylt vilkåra i 12 samanhengande månader (eitt oppteningsår). Opptening etter den føreslåtte ordninga kan reknast frå 1. januar 2025.
Føreslår endringar for Finnmark og Nord-Troms
Regjeringa føreslår at gjeldssletteordninga for Finnmark og Nord-Troms blir endra slik at låntakarar kan få sletta 60 000 kroner per år av lånesummen ved avslutta utdanning. I dag får dei sletta inntil 30 000 kroner kvart år. For å få sletta gjeld etter denne ordninga, er det eit krav at du både bur og er yrkesaktiv i Finnmark eller Nord-Troms i 12 samanhengande månader.
Det er også for denne ordninga føreslått at berre gjeld frå fullførte studiepoeng i høgare utdanning eller høgare yrkesfagleg opplæring kan bli sletta.
Gjeld kan bli sletta når du har oppfylt vilkåra i 12 samanhengande månader (eitt oppteningsår). Opptening etter dei føreslåtte reglane kan reknast frå 1. januar 2025.
Når blir det bestemt korleis ordningane blir?
Det vil ta tid før det blir endeleg avklart korleis ordningane blir. Etter at Stortinget har vedteke statsbudsjettet, skal Kunnskapsdepartementet fastsette forskrifter for ordningane. Denne sida vil bli oppdatert når dette skjer.
Les regjeringa si pressemelding om forslag til distriktsordningar