Søknad om stipend og lån til utveksling utanfor Norden

I søknaden søker du om basislån, reisestøtte og eventuelt skolepengestøtte. Du kan velje å søke om stipend, og då får du berre stipenddelen av skolepengestøtta og reisestøtta, i tillegg til den delen av basislånet som kan bli gjort om til stipend

Søknaden gjeld også for andre stipend og lån som berre nokre har krav på. Dette er barnestipend, tilleggslån, språkstipend og flyktningstipend.

Det er eigne søknader for foreldrestipend og for tilleggsstipend ved nedsett funksjonsevne.

Som regel hentar vi automatisk ei stadfesting på at utvekslingsopphaldet ditt er førehandsgodkjent. I nokre tilfelle må du likevel sende dokumentasjon til oss.

Skal du betale skolepengar til den utanlandske lærestaden, må du sende dokumentasjon som viser kor mykje du skal betale.

Du kan laste opp dokumentasjon på Dine sider på lanekassen.no eller sende den i posten etter at du har søkt om lån og stipend.

Dersom du tar ein joint degree (samarbeidsgrad mellom fleire lærestader), betyr det at du vil vere student ved forskjellige lærestader i løpet av graden din. 

Du blir ikkje rekna som ein utvekslingsstudent, men som ein vanleg student. Du skal derfor velje at du tek heile utdanninga i Noreg, eller heile utdanninga i utlandet når du blir spurt om det i søknaden. Vel det svaralternativet som stemmer med kvar du tek utdanning i det semesteret du søker for. Når du byter lærestad, skal du sende ein ny søknad og velje det alternativet som er riktig for det semesteret.

Det betyr òg at du og utdanninga må oppfylle vilkåra for lån og stipend til utdanning i utlandet i dei semestera du tek utdanning utanfor Noreg.

Du får svar, eller beskjed om status for søknaden, innan 24 timar.

Søknaden er ikkje synleg på Dine sider med éin gong, men så lenge du har fått kvittering, har vi fått søknaden din. På Dine sider får du også informasjon om anslått behandlingstid for søknaden din.