Om lag 50 000 kundar har sendt inn søknad om sletting av studielån etter ordningane for utvalde distriktskommunar og innsatssona. Mange søknader er framleis til behandling, men allereie har 34 000 kundar fått sletta gjeld.
820 millionar kroner er sletta gjennom den nye distriktsordninga, medan om lag 55 millionar kroner er sletta i innsatssona, som omfattar Finnmark og Nord-Troms.
Med den nye ordninga kan yrkesaktive som bur i utvalde distriktskommunar, få sletta inntil 25 000 kroner i året. Lengst nord i landet, i Finnmark og Nord-Troms, kan låntakarar som bur og jobbar der, få sletta inntil 60 000 kroner årleg. For begge ordningane er det krav om at ein bur i ein godkjend kommune i ein oppteningsperiode på 12 samanhengande månader.
Enkel og automatisert behandling
Dei fleste søknadene som kjem inn til Lånekassen, blir behandla automatisk utan at ein saksbehandlar treng å sjå på dei. Då får kundane raskt svar.
– I søknaden om gjeldssletting i distriktskommunar og i innsatssona hentar Lånekassen inn opplysningar om bustad og yrkesaktivitet frå offentlege register der det er mogleg. Når det ikkje er mogleg, blir kundane bedne om å sende inn dokumentasjon sjølve, seier Anette Bjerke, kommunikasjonsdirektør i Lånekassen.
Dersom kunden må sende inn dokumentasjon, blir søknaden behandla manuelt, og det tar lengre tid å få svar. Gjelda blir sletta først når søknaden er godkjend, men lengre saksbehandlingstid fører ikkje til at kunden mistar noko av oppteningsperioden eller pådrar seg ekstra renter.
Flest i Vestland
Tal frå dei tre første månadene i år viser at det er flest yrkesaktive opp til 39 år som har fått sletta studiegjeld. Av dei 34 000 låntakarane som hittil har fått sletta gjeld, er 67 prosent 39 år eller yngre. 14 prosent er under 30 år.
63 prosent av dei innvilga søknadene er frå kvinner.
Ser vi på samla beløp fordelte på fylke, har låntakarar i Vestland fått mest sletta, med 234 millionar kroner. I Nordland, Trøndelag og Møre og Romsdal er det hittil sletta meir enn 100 millionar kroner i kvart av fylka.
Hugs tre månaders frist
Fristen for å søke om sletting av gjeld er tre månader etter at oppteningsperioden er avslutta.
– Dersom du søker seinare enn tre månader etter full opptening, kan du gå glipp av dagar eller veker i oppteningsperioden, avhengig av kor lenge etter fristen du søker, seier Bjerke.
Det er òg viktig å vere klar over at du må søke på nytt kvart år.