Fastrentene i Lånekassen frå 1. september

Medan tre års fastrente som gjeld frå 1. september går noko ned samanlikna med dagens treårsrente (0,029 prosentpoeng ned), går fem- og tiårsrenta opp med 0,087 og 0,058 prosentpoeng. Fastrentene som gjeld frå 1. september vil vere:

• 3 års bindingstid: 4,755 prosent
• 5 års bindingstid: 4,717 prosent
• 10 års bindingstid: 4,583 prosent

Dei som ønsker å binde studielånsrenta frå 1. september, kan gjere det på Lånekassen sine nettsider i perioden 10.–17. august.

Flytande rente som gjeld frå 1. september vil vere 5,242 prosent.

Seks moglegheiter i året til å binde renta

Alle får automatisk flytande rente på studielånet sitt når dei ikkje lenger får støtte frå Lånekassen, men dei som ønsker det, kan søke om fastrente. Det er mogleg å søke om fastrente seks gonger i året, og ein kan binde renta i tre, fem eller ti år.

I underkant av 800 000 kundar betaler ned på studielånet sitt. 764 000 har flytande rente, medan 15 000 har fastrente.

Basert på dei beste bustadlånsrentene

Rentene i Lånekassen blir fastsette ut frå gjennomsnittet av dei fem beste tilboda om bustadlån i marknaden. Frå dette snittet blir det trekt 0,15 prosentpoeng, som gir Lånekassens renter.

Det er Finanstilsynet som observerer utviklinga av bustadlånsrentene, og som fastset Lånekassens rentesatsar.

Les meir:

Slik blir renta i Lånekassen fastsett
Renteutviklinga i Lånekassen